Poet
chaḌhe hue hain jo dariya utar bhi ja.enge
mire baghair tire din guzar bhi ja.enge
uḌa rahi hain hava.en para.e sehnon men
Dhalegi raat to ham apne ghar bhi ja.enge
jo ro rahi hai yahi aankh hans rahi hogi
tire dayar men bar-e-digar bhi ja.enge
talash ḳhud ko kahin ḳhak-o-ab men kar len
tumhare khoj men phir dar-ba-dar bhi ja.enge
hamesha ek si halat pe kuchh nahin rahta
jo aa.e hain to kaḌe din guzar bhi ja.enge
ye phuul phuul kisi ḳhushnuma ki tahriren
ye lafz ma.anon se apne mukar bhi ja.enge
Leave a Reply