Rana Abdurrab
hathon se gir ga.i mire miTTi ki ḳhair ho
ghar men hi baiThi rah ga.i beTi ki ḳhair ho
hathon ke ok men mire jalta raha charagh
aadhi hatheli jal ga.i aadhi ki ḳhair ho
basti men bansuri ki sada jab suna.i de
banjare tu jiye tiri vanjli ki ḳhair ho
main ne to ek sher kaha husn-e-yar par
mahfil men jhumti hui laḌki ki ḳhair ho
dil ke har ek saaz pe raqsan hain dhaḌkanen
teri bhi ḳhair ho tiri masti ki ḳhair ho
nikli hai dasht ko vo panah ki hi aas men
vahshat bhare jahan men siski ki ḳhair ho
ik vasl ek hijr hai dulhan ki maang men
shahna.iyon men dab chuki siski ki ḳhair ho
is vaste na mangi kabhi apni ḳhair dost
main chahta yahi tha ki bas teri ḳhair ho
paala hai is ne maan ki tarah apni god men
teri bhi ḳhair ho miri miTTi ki ḳhair ho
dam dam hamari aankh se Tapke sharab-e-ishq
ankhon ne di dua mire saaqi ki ḳhair ho
‘abdul’ nasib ho use phulon ka ik jahan
hathon se uḌne vaali bhi titli ki ḳhair ho
Leave a Reply