Rahat Indori
bimar ko maraz ki dava deni chahiye
main piina chahta huun pila deni chahiye
allah barkaton se navazega ishq men
hai jitni punji paas laga deni chahiye
dil bhi kisi faqir ke hujre se kam nahin
duniya yahin pe la ke chhupa deni chahiye
main khud bhi karna chahta huun apna samna
tujh ko bhi ab naqab utha deni chahiye
main phuul huun to phuul ko gul-dan ho nasib
main aag huun to aag bujha deni chahiye
main taaj huun to taaj ko sar par sajaen log
main khaak huun to khaak uda deni chahiye
main jabr huun to jabr ki taid band ho
main sabr huun to mujh ko dua deni chahiye
main khvab huun to khvab se chaunkaiye mujhe
main niind huun to niind uda deni chahiye
sach baat kaun hai jo sar-e-am kah sake
main kah raha huun mujh ko saza deni chahiye
Leave a Reply