Nau Bahar Sabir
kanTe ko phuul sang ko gauhar kaha gaya
is shahr men gada ko sikandar kaha gaya
be-chehra log husn ka me.aar ban ga.e
parchha.iyon ko nuur ka paikar kaha gaya
jallad ko masiha-nafas ki sanad mili
insan-dushmanon ko payambar kaha gaya
kuchh jis ke paas nish-o-namak ke siva na tha
chak-e-jigar ka us ko rafu-gar kaha gaya
kya shai hai maslahat bhi shab-e-tira-fam ko
danishvaron men sub.h-e-munavvar kaha gaya
gunga hai kar raha hai isharon men bat-chit
‘sabir’ ko kis bina pe suḳhnavar kaha gaya
Leave a Reply