suni kisi ne kahan mere intizar ki baat
har ik zaban pe rahi iḳhtiyar-e-yar ki baat
abhi hai vaqt chalo rabta bahal karen
dila.en yaad use ahd-e-pa.edar ki baat
abhi hain karb ke kuchh aur marhale baaqi
abhi chali hi kahan hai mire dayar ki baat
yahan shajar ka shajar daav par hai nadanon
tumhare lab pe vahi shaḳh-o-barg-o-bar ki baat
baḌa baligh ishara tha us ki baton men
hamara zikr tha aur raah ke ghubar ki baat
kisi ke dil ke ujaḌne ki baat hai ‘anvar’
ḳhizan ki baat nahin hai nahin bahar ki baat
Leave a Reply