abu-bakr-abbad

Jaane Kyun Aisa Hun Main

lambe vaqt se soch raha huun

jaane kyuun aisa huun main

milne se ghabrata huun main jhuut nahin kah paata huun

us ke shikve us ki shikayat jhagde se Dar jaata huun

idhar-udhar ki baten mujh ko zara na khush kar paati hain

jaane kyuun aisa huun main

dost nahin ban paate mere

rishte nahin sambhalte hain

beja mohabbat beja takalluf

donon ochhe lagte hain

auron ki kamiyon ko bilkul

achchha nahin kah paata huun

jaane kyuun aisa huun main

achchhe bhale kamon men aksar

der bahut kar deta huun

ammi se baten karni huun beti ke schōl ho jaana

koi naya novel padhna ho koi kahani likhni ho

sab ko talta rahta huun

jaane kyuun aisa huun main

bhiid bhare shahron se mujh ko

vahshat si ho jaati hai

gaanv jangal sunsan jag.hen

aksar khush aa jaati hain

koi alhad chehra dekhun man ko vo bha jaata hai

jaane kyuun aisa huun main

pedon ke pairahan dekhun phulon ki khushbu ko sunghun

rang-birangi titliyan pakdun halki halki bunden bhi

thanDi naram havaen jab jab chupke se chhu jaati hain

ya koyal ki boli sun luun man byakul ho jaata hai

jaane kyuun aisa huun main

nat banjaran sanyasi aur khel-tamashe vaale log

khanDar virana jalti dhuup phuli sarson dhaan ke khet

laal patang aur piili maina indr-dhanush aur nadi ki dhaar

aate hain jab khvab men mere divana ho jaata huun

jaane kyuun aisa huun main

bahut mujhe achchha kahte hain bura bhi koi kahta hai

samne meri mad.h-sarai pichhe gaali deta hai

hamdardi hai koi dikhata koi sazish karta hai

phir bhi chup chup sa rahta huun jaise bahut anjan huun main

jaane kyuun aisa huun main

thodi si azadi mujh ko thoda bahut vaqt ka ziyan

kabhi kabhar ki achchhi baten kisi kisi ka sachcha pyaar

chhoti-moti koi shararat khilkhila kar hansna bhi

ye sab khush kar jaate hain jab to

lagta hai ki zinda huun

jaane kyuun aisa huun main

More Poems

Leave a Comment