Tilok Chand Mahroom
dast-e-ḳhirad se parda-kusha.i na ho saki
husn-e-azal ki jalva-numa.i na ho saki
rang-e-bahar de na sake ḳharzar ko
dast-e-junun men abla-sa.i na ho saki
ai dil tujhe ijazat-e-fariyad hai magar
rusva.i hai agar shunava.i na ho saki
mandir bhi saaf ham ne kiye masjiden bhi paak
mushkil ye hai ki dil ki safa.i na ho saki
fikr-e-ma.ash o ishq-e-butan yad-e-raftagan
in mushkilon se ahd-bar.a.i na ho saki
ghafil na tujh se ai gham-e-uqba the ham magar
dam-e-gham-e-jahan se riha.i na ho saki
munkir hazar baar ḳhuda se hua bashar
ik baar bhi bashar se ḳhuda.i na ho saki
ḳhud zindagi bura.i nahin hai to aur kya
‘mahrum’ jab kisi se bhala.i na ho saki
Leave a Reply