suḳhan-vari hamen kab tajribe se aa.i hai
zaban men chashni dil TuTne se aa.i hai
jidhar se mera badan dhuup chaaT kar guzra
hava-e-sard usi raste se aa.i hai
taḌapta main huun pasina hai us ke mathe par
shikast-e-dil ki sada aa.ine se aa.i hai
khula subut hai ye dushmanon ke shab-ḳhun ka
ki dhuul Thahre hue qafile se aa.i hai
safar men saath mira aur koi kya deta
hava bhi meri taraf samne se aa.i hai
sahar ne mujh ko ‘muzaffar’ nahin kiya saiqal
miri nazar men chamak ratjage se aa.i hai
Leave a Reply