bulawa

chalo us koh par ab ham bhi chadh jaaen

jahan par ja ke phir koi bhi vapas nahin aata

suna hai ik nida-e-ajnabi bahon ko phailae

jo aae us ka istiqbal karti hai

use tarikiyon men le ke akhir duub jaati hai

yahi vo rasta hai jis jagah saaya nahin jaata

jahan par ja ke phir koi kabhi vapas nahin aata

jo sach puchho to ham tum zindagi bhar harte aae

hamesha be-yaqini ke khatar se kanpte aae

hamesha khauf ke pairahanon se apne paikar dhanpte aae

hamesha dusron ke saae men ik dusre ko chahte aae

bura kya hai agar us koh ke daman men chhup jaaen

jahan par ja ke phir koi kabhi vapas nahin aata

kahan tak apne bosida badan mahfuz rakkhenge

kisi ke nakhunon hi ka muqaddar jaag lene do

kahan tak saans ki dori se rishte jhuut ke bandhen

kisi ke panja-e-be-dard hi se tuut jaane do

phir is ke baad to bas ik sukut-e-mustaqil hoga

na koi surkh-ru hoga, na koi munfail hoga