Chand Mashriq Se Nikalta Nahin Dekha Maine

Saeed Qais

chand mashriq se nikalta nahin dekha main ne

tujh ko dekha hai to tujh sa nahin dekha main ne

hadisa jo bhi ho chup-chap guzar jaata hai

dil se achchha koi rasta nahin dekha main ne

phir dariche se vo ḳhushbu nahin pahunchi mujh tak

phir vo mausam kabhi dil ka nahin dekha main ne

mom ka chand hatheli pe liye phirta huun

shahr men dhuup ka mela nahin dekha main ne

chaḌhte suraj ki shuaon ne mujhe paala hai

jo utar jaa.e vo dariya nahin dekha main ne

phir mire paanv ki zanjir hila de koi

kab se is shahr ka rasta nahin dekha main ne

mujh ko paani men utarne ki saza deta hai

vo samajhta hai ki dariya nahin dekha main ne

‘qais’ kahte hain faqiron pe bahut bhaunkta hai

apne ham-sa.e ka kutta nahin dekha main ne