Sufi
harf-e-shikva na lab pe laao tum
zakhm kha kar bhi muskurao tum
apne haq ke liye lado be-shak
dusron ka na haq dabao tum
sab ise dil-lagi samajhte hain
ab kisi se na dil lagao tum
maslahat ka yahi taqaza hai
vo na manen to maan jaao tum
apna saaya bhi ab nahin apna
apne saae se khauf khaao tum
maut mandla rahi hai shahron par
ja ke sahra men ghar banao tum
doston ko to khuub dekh chuke
dushmanon ko bhi azmao tum
rasti pe madar ho jis ka
ab na vo baat lab pe laao tum
jo bhala mangte the sar but ka
in buzurgon ko phir bulao tum
Leave a Reply