Apna Bimar Hai Dil Ishq Ka Bimar Nahin

Nashtar Khaanqahi

apna bimar hai dil ishq ka bimar nahin

ḳhud tashaffi ke siva hijr ka azar nahin

tirgi aisi ghazab ki ki ayazan-billah

aisa lagta hai ki ghar hai dar-o-divar nahin

hashr ke ba.ad bhi viran hi rahegi jannat

kaun haqdar hai koi bhi to haqdar nahin

tah main kuchh aur hain uupar se hain ḳhabren kuchh aur

ba-ḳhabar tum bhi nahin main bhi ḳhabar-dar nahin

jis ki chaukhaT pe bhi rukta huun yahi lagta hai

ye dar-e-yar nahin ye bhi dar-e-yar nahin

nekiyon ke liye mahaul muafiq bhi to ho

kaun kahta hai ki mera koi kirdar nahin