har chand ki laa.e the jigar chiir ke moti
arzan hi rahe nala-e-shab-gir ke moti
ik maan ne bilakte hue bachchon ke liye shab
beche kisi bazar men tauqir ke moti
har rang jamate hain yaqin-tab badan ka
in ḳhvab se honTon pe asatir ke moti
dahliz-e-mohabbat se sameTe hain hamesha
taare kisi shirin ke kisi hiir ke moti
ḳhamoshi kahegi ḳhalish-e-jan ka fasana
palkon se chune ja.enge tasir ke moti
zulmat-kada-e-fikr men taban hain azal se
ghalib ke kahin ‘mir’-taqi-‘mir’ ke moti
kaafi se ziyada hai ye tavan junun ka
hain kasa-e-zanu men jo zanjir ke moti
ho ja.enge mujh aise siyahkar ki ḳhatir
baḳhshish ka vasila gham-e-shabbir ke moti
Leave a Reply