yak-ba-yak mausam ki tabdili qayamat dha gai
ruk ke sustana tha jab mujh ko kaḌi dhuup aa gai
din dhale kis ko hai tajdid-e-safar ka hausla
aati jaati rahguzar nahaq mujhe bahka gai
bu-e-gul mauj-e-hava hai aur hava kyunkar ruke
ab ke miTTi hi ki ḳhushbu mera ghar mahka gai
vo havaen hain uḌe jaate hain pairahan yahan
ai urus-e-zist tu kyuun ghar se bahar aa gai
ye hava aai kahan se is se main vaqif na tha
mere ghar men jo charaghon ka dhuan phaila gai
vo ghaTa phir is taraf se lauT kar guzri nahin
sukhi dharti ko jo dariya ka pata batla gai
zindagi marg-e-talab tark-e-talab ‘aḳhtar’ na thi
phir bhi apne tane-bane men mujhe uljha gai