Farhat Abbas Shah
tu apne hone ka har ik nishan sambhal ke mil
yaqin sambhal ke mil aur guman sambhal ke mil
ham apne baare kabhi mushta.il nahin hote
faqir log hain ham se zaban sambhal ke mil
vajud-e-vahima viraniyon men ghumta hai
ye be-karan hai to phir be-karan sambhal ke mil
ye marhale hain ajab is liye samundar se
hua ko thaam ke mil badban sambhal ke mil
agarche dost hain saare hi as-pas magar
usuul ye hai ki tir-o-kaman sambhal ke mil
tu kaisi ghair-yaqini faza men milta hai
koi to lamha kabhi darmiyan sambhal ke mil
phir us ke ba.ad to shayad rahe rahe na rahe
tamam umr ka sud-o-ziyan sambhal ke mil
Leave a Reply