Muzaffar Warsi
raat ga.e yuun dil ko jaane sard hava.en aati hain
ik darvesh ki qabr pe jaise raqqasa.en aati hain
sada-lauhi ki nibTegi is rangin zamane se
do ankhon ka pichha karne laakh ada.en aati hain
DhunDh rahi hai mere tan men shayad meri ruuh mujhe
apne sannaTon se kuchh manus sada.en aati hain
mera ik ik lamha karb liye phirta hai sadiyon ka
ik duniya ke raste men kitni duniya.en aati hain
pahle sar se unchi lahron se bhi ham laḌ lete the
ab to in sukhe honTon par sirf dua.en aati hain
dasht-navardi ke dauran ‘muzaffar’ sar par dhuup rahi
jab se kashti men baiThe hain roz ghaTa.en aati hain
Leave a Reply