Niyaz Nazr Fatmi
chaman men gul-fishani ho rahi hai
hava ki mehrbani ho rahi hai
yahan main qatra qatra ghul raha huun
mohabbat paani paani ho rahi hai
main aksar niind men Darne laga huun
miri beTi siyani ho rahi hai
hamare bachche bhi paḌh likh rahe hain
tumhen kyon bad-gumani ho rahi hai
idhar mehman aksar aa rahe hain
udhar chadar purani ho rahi hai
unhen palkon pe rakkha hai biTha kar
anokhi mezbani ho rahi hai
abhi tak ‘nazr’ ki palken hain bhari
bayan shab ki kahani ho rahi hai
Leave a Reply