utar kar paniyon men chand mahv-e-raqs rahta hai
miri ankhon men kuchh is taur koi shaḳhs rahta hai
ajab hairat hai akasr dekhta hai mere chehre ko
ye kis na-ashna ka aa.ine men aks rahta hai
miri basti ka koi ghar bhi ghar jaisa nahin lagta
kahin ta.amir-e-bam-o-dar men koi naqs rahta hai
jami hai gard ankhon men ka.i gumnam barson ki
mire andar na jaane kaun buḌha shaḳhs rahta hai
chalo bad-e-saba ko jangalon se DhunDh kar laa.en
fasil-e-shahr men ‘az.har’ bala ka habs rahta hai
Leave a Reply