kabhi to dil ka kaha dil se vo sunega hi
ye qatra sang men suraḳh to karega hi
vo mere haath se barsat ke zamane men
pakauḌe kha.ega aur chaa.e bhi piyega hi
suhani shaam kisi dil-nashin vaadi men
vo do hi saath saath chale chalega hi
abhi ye soch ke main zulm sahti jaati huun
kabhi to haath tire zulm ka rukega hi
ye dagh-e-dil nahin jo chhup sake chhupane se
badan ka zaḳhm hai ab ḳhuun to bahega hi
asiir sab hain fana ke hisar men lekin
ḳhuda ki yaad se behtar sila milega hi
shu.ur se hi bashar chand par bhi pahuncha hai
zamana ilm ki daulat se to baḌhega hi
koi ghurur men elan-e-ḳhud-sari kar le
ḳhuda ke samne aḳhir ko sar jhukega hi
‘sabila’ tere haqiqat bayan karne se
jahan pe raz-e-junun ek din khulega hi
Leave a Reply