ik ḳhvab niind ka tha sabab, jo nahin raha
us ka qalaq hai aisa ki main so nahin raha
vo ho raha hai jo main nahin chahta ki ho
aur jo main chahta huun vahi ho nahin raha
nam diida huun, ki teri ḳhushi par huun ḳhush bahut
chal chhoḌ, tujh se kah jo diya, ro nahin raha
ye zaḳhm jis ko vaqt ka marham bhi kuchh nahin
ye dagh, sail-e-girya jise dho nahin raha
ab bhi hai ranj, ranj bhi ḳhasa shadid hai
vo dil ko chirta hua gham go nahin raha
abad mujh men tere siva aur kaun hai?
tujh se bichhaḌ raha huun tujhe kho nahin raha
kya be-hisi ka daur hai logo ki ab ḳhayal
apne siva kisi ka kisi ko nahin raha
Leave a Reply