Naresh Kumar Shad
bad-guman mujh se na ai fasl-e-baharan hona
meri aadat hai ḳhizan men bhi gul-afshan hona
mere gham ko bhi dil-avez bana deta hai
teri ankhon se mire gham ka numayan hona
kyuun na pyaar aa.e use apni pareshani par
siikh le jo tiri zulfon se pareshan hona
mere vijdan ne mahsus kiya hai aksar
teri ḳhamosh nigahon ka ghazal-ḳhvan hona
ye to mumkin hai kisi roz ḳhuda ban jaa.e
ghair mumkin hai magar shaiḳh ka insan hona
apni vahshat ki numa.ish mujhe manzur na thi
varna dushvar na tha chak-gireban hona
rahrav-e-shauq ko gumrah bhi kar deta hai
baaz auqat kisi raah ka asan hona
kyuun gurezan ho miri jaan pareshani se
dusra naam hai jiine ka pareshan hona
jin ko hamdard samajhte ho hansenge tum par
hal-e-dil kah ke na ai ‘shad’ pashiman hona
Leave a Reply