jab chaudhvin ka chand nikalta dikha.i de
vo gerua libas badalta dikha.i de
dariya-e-zindagi ki nigahon ka hai qusur
Thahra dikha.i de kabhi chalta dikha.i de
paḌne lage jo zor havas ka to kya nigah
har zaviye se jism nikalta dikha.i de
bahrupiye ke haath paḌe hain so raat din
din raat rang-rup badalta dikha.i de
rakkhe hai yuun to paanv sambhal-soch kar magar
nazron ka farsh hai ki phisalta dikha.i de
us naam men vo shola-gari hai jo lijiye
har room men charagh sa chalta dikha.i de
main ‘ashk’ shakl naam se vaqif nahin magar
ik shaḳhs hai jo saath hi chalta dikha.i de
Leave a Reply