Altaf Mashhadi
ho ga.i ishq men badnam javani apni
ban ga.i markaz-e-alam javani apni
mazi-o-hal hain mahrum-e-sharab-o-naghma
haa.e afsurda-o-nakam javani apni
aah vo sub.h jo thi sub.h-e-bahar-e-hasti
hai usi sub.h ki ab shaam javani apni
ek tarik faza ek ghaTa sa mahaul
kisi muflis ka hai anjam javani apni
unhin rahon men unhin mast-o-javan galiyon men
laḌkhaḌa.i hai bahar-gam javani apni
ek vo din tha ki mai-ḳhanon pe ham bhari the
aaj hai daur-e-tah-e-jam javani apni
iktifa kar ke khanakte hue roz-o-shab par
ban ga.i ziist par ilzam javani apni
din hua dhuup chaḌhi Dhal ga.e saa.e ‘altaf’
ab hai ik bujhti hui shaam javani apni
Leave a Reply