Ejaz Gul
ham tum jab bhi pyaar karenge jan-o-dil sadqe honge
ruhon ki ḳhushbu men hongi bahon ke gajre honge
peshravo tum biit chuke ab ham logon ki baari hai
zindanon ke dar to va hon ham aage aage honge
gumnami ki galiyon men tariḳh kahan tak pahunchegi
ek tumhi suqrat nahin ho aur bahut guzre honge
husn agar zanjir kiya hai ishq bhi phir zanjir karo
varna baat bahut phailegi duur talak charche honge
ai chakval se aane vaalo kuchh to hal-ahval kaho
phuul se aariz chand se chehre tum ne bhi dekhe honge
Leave a Reply