haqiqat se zaban agah kar le
ye ism-e-allah bismillah kar le
dhun se duur kar qufl dui ko
zaban miftah-e-il-lallah kar le
kudurat dil se kho lahv-o-laab ki
saadat se safa hai raah kar le
mubarakbad aish-o-jah-o-daulat
hazuz-e-umr khatir-khvah kar le
kahan fursat zaman-e-kashmakash men
munasib hai abhi kuchh raah kar le
jise dekha na dekh us ko kabhi tu
na dekha jis ko us ki chaah kar le
sakha himmat muravvat hain tire paas
koi hamrah tu hamrah kar le
bhulava hai tilism-e-zindagani
vida-e-hubb-e-uzv-e-jah kar le
‘nasim’-dehlavi ye aarzu hai
kahin apna mujhe allah kar le