mire dukh dard har ik aankh se ojhal paḌe the
shukr-sad-shukr ki bas ruuh pe hi bal paḌe the
kisi maqsad se tire paas nahin aa.e hain
kahin jaana hi tha so teri taraf chal paḌe the
ek main hi nahin shab chhat pe basar karta tha
chand ke pichhe ka.i aur bhi pagal paḌe the
kaisa nazzara tha kohsaron ki shahzadi ka
baam par vo khaḌi thi farsh pe badal paḌe the
jald-bazon ne bichhaḌne men baḌi ujlat ki
ek ik mas.ale ke varna ka.i hal paḌe the
ḳhud se ḳhud tak ka safar sahl nahin tha itna
raste men ka.i dariya ka.i jangal paḌe the
ijz ke ashk bahate hue shab so gaya main
sub.h uTTha to mire kaam mukammal paḌe the
dhyan tayyari ka aaya hi nahin ham ko ‘aqil’
safar-e-ishq tha be-raḳht-e-safar chal paḌe the
Leave a Reply