Zindagi Jis Par Hanse Aisi Koi KHwahish Na Ki

Muzaffar Warsi

zindagi jis par hanse aisi koi ḳhvahish na ki

ghaao siine men saja.e ghar ki ara.ish na ki

nukta-chini par miri tum itne bargashta na ho

kah diya jo kuchh bhi dil men tha magar sazish na ki

ek se halat aa.e hain nazar har daur men

ruk ga.e mere qadam ya vaqt ne gardish na ki

jhuk gaya qadmon pe tere phir bhi sar uncha raha

aankh patthar ho ga.i jalvon ki farma.ish na ki

laakh nazron ko uchhala tu na aaya baam par

saa.e sar paTḳha kiye divar ne jumbish na ki

main ne jin ankhon ko siine men utara phir ga.iin

ḳhud ko apnane ki is Dar se kabhi koshish na ki

rah ke mahdud-e-vasa.il ki ‘muzaffar’ ne basar

paanv phaila kar kabhi chadar ki paima.ish na ki