Ajab KHajalat-E-Jaan Hai Nazar Tak Aai Hui

ajab ḳhajālat-e-jāñ hai nazar tak aa.ī huī

ki jaise zaḳhm kī taqrīb-e-rū-numā.ī huī

nazar to apne manāzir ke ramz jāntī hai

ki aañkh kah nahīñ saktī sunī-sunā.ī huī

barūn-e-ḳhāk faqat chand Thekre haiñ magar

yahāñ se shahr mileñge agar khudā.ī huī

ḳhabar nahīñ hai ki tū bhī vahāñ mile na mile

agar kabhī mire dil tak mirī rasā.ī huī

maiñ āñdhiyoñ ke muqābil khaḌā huā huuñ ‘sa.ūd’

paḌī hai fasl-e-mohabbat kaTī-kaTā.ī huī

Leave a Comment