aa.ine tujh pe hi saiqal nahin arzani ka
marhala sirf bacha hai miri hairani ka
tujh se mil aa.e bahut pech bahut taab ke ba.ad
qarz utra hi nahin dil ki pashemani ka
chahe jis baab se tu mujh ko riha.i de de
mujh pe mushkil nahin rasta tiri asani ka
bujh ke rahna kabhi be-saḳhta jalna kya hai
ḳhuub andaz hai janan tiri mehmani ka
ye kitabon ye risalon ka safar kuchh bhi nahin
isti.ara hi bahut hai tiri peshani ka
lamp bujhte hi sirhane ka pari aati hai
rat-bhar phir vahi mausam tire zindani ka
Leave a Reply