Duub kar ubharne men der kitni lagti hai
raat ke guzarne men der kitni lagti hai
chunriyon men chuḌi men rang kitne bhate hain
rang ke utarne men der kitni lagti hai
maan ke peT men bachcha rome rome baḌhta hai
aadmi ko marne men der kitni lagti hai
ghar ko ghar banane men umr biit jaati hai
phir makan girne men der kitni lagti hai
ungliyon ki poron men kirchiyan utarti hain
kanch ke bikharne men der kitni lagti hai
umr kaise Dhalti he maut kaise palti hai
chaar din guzarne men der kitni lagti hai
shaḳh ki hatheli par phuul muskurata hai
phuul ke bikharne men der kitni lagti hai
dosti ke rishte par jab saval uThta hai
dost ko mukarne men der kitni lagti hai
umr bhar ke sathi jab raste badalte hain
umr ko guzarne men der kitni lagti hai
maslahat ke parde ki umr kitni hoti hai
ye naqab utarne men der kitni lagti hai
ek sar ki chadar ho aur paanv men chappal
apne saj sanvarne men der kitni lagti hai
Leave a Reply