diye jalenge to phir raushni to hogi naan
class-fellow hain ham dosti to hogi naan
nazar jhuka.e yunhi paas se nahin guzra
fareb-kar ko sharmindagi to hogi naan
ye mera faiz nahin ḳhanvade ka hai mizaj
so mere charon taraf raushni to hogi naan
hamare jeb-tarashon ke husn-e-zan ko salam
ki zar hua na hua sha.iri to hogi naan
kabhi jo ankhon se karte the aaj kahna paḌin
hamari baton men be-rabtagi to hogi naan
parinde apne Thikanon pe uḌ ke ja chuke hain
hamare nan-o-namak men kami to hogi naan
Leave a Reply