Hafeez Jaunpuri
but-kada nazdik ka.aba duur tha
main idhar hi rah gaya majbur tha
shaam hi se ham kahin jaate the roz
muddaton apna yahi dastur tha
vo kiya jis men ḳhushi thi aap ki
vo hua jo aap ko manzur tha
kuchh adab se rah ga.e naale idhar
kya bata.en arsh kitni duur tha
jis ghaḌi tha us ke jalve ka zuhur
arsh ka ham-sang koh-e-tur tha
ik hasin ka aa gaya jo tazkira
der tak mahfil men zikr-e-hur tha
vasl ki shab thi shab-e-me.araj kya
duur tak phaila hua ik nuur tha
har kas-o-na-kas se kya milti nigah
apni ankhon men but-e-maghrur tha
umr bhar fikr-e-suḳhan men tha ‘hafiz’
sha.eri ka dil men ik nasur tha
Leave a Reply