Faiz Ahmad Faiz
aur kuchh der men jab phir mire tanha dil ko
fikr aa legi ki tanhai ka kya chara kare
dard aaega dabe paanv liye surkh charagh
vo jo ik dard dhadakta hai kahin dil se pare
shola-e-dard jo pahlu men lapak utthega
dil ki divar pe har naqsh damak utthega
halqa-e-zulf kahin gosha-e-rukhsar kahin
hijr ka dasht kahin gulshan-e-didar kahin
lutf ki baat kahin pyaar ka iqrar kahin
dil se phir hogi miri baat ki ai dil ai dil
ye jo mahbub bana hai tiri tanhai ka
ye to mehman hai ghadi-bhar ka chala jaega
us se kab teri musibat ka mudava hoga
mushtail ho ke abhi utthenge vahshi saae
ye chala jaega rah jaenge baaqi saae
rat-bhar jin se tira khun-kharaba hoga
jang thahri hai koi khel nahin hai ai dil
dushman-e-jan hain sabhi saare ke saare qatil
ye kadi raat bhi ye saae bhi tanhai bhi
dard aur jang men kuchh mel nahin hai ai dil
laao sulgao koi josh-e-ghazab ka angar
taish ki atish-e-jarrar kahan hai laao
vo dahakta hua gulzar kahan hai laao
jis men garmi bhi hai harkat bhi tavanai bhi
ho na ho apne qabile ka bhi koi lashkar
muntazir hoga andhere ki fasilon ke udhar
un ko sholon ke rajaz apna pata to denge
khair ham tak vo na pahunche bhi sada to denge
duur kitni hai abhi subh bata to denge
Leave a Reply