Poet
na jaane kaisi andhi chal rahi hai
hai jangal ḳhush ki basti jal rahi hai
kahin paani se dhoka kha na jaana
ye naddi muddaton daldal rahi hai
tira suraj bhi ThanDa ho raha hai
hamari umr bhi ab Dhal rahi hai
koi shikva nahin ham ko kisi se
ḳhud apni zaat ham ko chhal rahi hai
hamen barbad kar ke ḳhush bahut thi
magar ab haath duniya mal rahi hai
tumhare lafz sho.ale kyuun hue hain
ghazal lagta hai jaise jal rahi hai
Leave a Reply