hava ke vaar pe ab vaar karne vaala hai
charagh bujhne se inkar karne vaala hai
ḳhuda kare ki tira azm barqarar rahe
zamana raah men divar karne vaala hai
vahi dikha.ega tujh ko tamam daagh tire
jise tu a.ina-bardar karne vaala hai
ye vaar to kabhi ḳhali nahin gaya mera
koi to us ko ḳhabar-dar karne vaala hai
usi ne rang bhare hain tamam phulon men
vahi shajar ko samar-dar karne vaala hai
zamin bech ke ḳhush ho rahe ho tum jis ko
vo saare gaanv ko bazar karne vaala hai
Leave a Reply