usi tarah ke shab-o-roz hain vahi duniya
purani khaak pe taamir hai nai duniya
main apne aap men gum tha mujhe khabar na hui
guzar rahi thi mujhe raundti hui duniya
har aadmi ko ye duniya badal ke rakh degi
badal saka na agar ab bhi aadmi duniya
nai hava ko madad ke liye pukarti hai
khud apni aag men jalti hui nai duniya
main jis havale se duniya pe ghaur karta huun
usi tarah se kabhi kaash sochti duniya
main apne asl ki janib ravan-davan huun aur
bula rahi hai musalsal mujhe miri duniya
Leave a Reply