vo Dhal raha hai to ye bhi rangat badal rahi hai
zamin suraj ki ungliyon se phisal rahi hai
jo mujh ko zinda jala rahe hain vo be-ḳhabar hain
ki meri zanjir dhire dhire pighal rahi hai
main qatl to ho gaya tumhari gali men lekin
mire lahu se tumhari divar gal rahi hai
na jalne paate the jis ke chulhe bhi har savere
suna hai kal raat se vo basti bhi jal rahi hai
main janta huun ki ḳhamushi men hi maslahat hai
magar yahi maslahat mire dil ko khal rahi hai
kabhi to insan zindagi ki karega izzat
ye ek ummid aaj bhi dil men pal rahi hai
Leave a Reply