Tha Kahan Likhna Use Lekin Kahan Par Likh Diya

Faza Ibn E Faizi

tha kahan likhna use lekin kahan par likh diya

main zamin ka harf mujh ko asman par likh diya

jis ke paḌhne se rahi qasir bhanvar ki aankh bhi

kaun jaane kya hava ne badban par likh diya

kuchh to kar dariya mire in ko Dubo ya paar kar

kashtiyon ne apna dukh ab-e-ravan par likh diya

baiTh kar ab zard patton ke varaq palTa karo

tabsira likhne ko mausam ne ḳhizan par likh diya

hashr men ḳhana-ḳharabi ko Thikana chahiye

us ne mera naam bhi apne makan par likh diya

aur ba-ma.ani hua tashkik ka pichhla nisab

kya kahun ahl-e-yaqin ne kya guman par likh diya

tum ise kah lo hisab-e-dostan-dar-dil ‘faza’

ham ne apna naf.a bhi lauh-e-ziyan par likh diya