Jahangeer Nayab
apne hisar-e-zat men uljha hua huun main
ya.ani ki ka.enat men uljha hua huun main
qaabu men aaj dil nahin kya ho gaya mujhe
phir aaj ḳhvahishat men uljha hua huun main
jaise ki hone vaali hai anhoni phir koi
har-pal tavahhumat men uljha hua huun main
kuchh apna farz pyaar tira fikr-e-rozgar
kitne hi vardat men uljha hua huun main
fursat kahan bana.un marasim na.e na.e
pichhle ta.alluqat men uljha hua huun main
sab hain asir-e-ranj-o-alam is jahan men
tanha kahan hayat men uljha hua huun main
‘nayab’ jab nahin hai vafaon ka us ko paas
phir kyuun takallufat men uljha hua huun main
Leave a Reply