jaan bhi pur-soz ho anjam-e-tamanna kya hai
koi batla.e ki jiine ka bahana kya hai
meri ankhon men nami bhi ho to vallah kya hai
koi bhi jis ko na dekhe vo tamasha kya hai
vo na chahen to maza chaah men phir ḳhaak mile
ham agar chahen bhi bil-farz to hota kya hai
dil sulagta hai sulagta rahe jalta hai jale
aisi baton se bhala ishq men banta kya hai
ham se mansub hain ummid-o-tamanna-o-ḳhayal
koi dekhe to zara aap ka naqsha kya hai
aql samjha.egi bahla.egi phusla.egi
dil ki chhalni se magar dekhiye chhanta kya hai
be-ḳhabar kitne the ‘mas.u’ rumuz-e-gham se
main jo roya to kaha dard se rota kya hai
Leave a Reply