dharti se duur hain na qarib asman se ham
kuufe ka haal dekh rahe hain jahan se ham
hindostan ham se hai ye bhi durust hai
ye bhi ghalat nahin ki hain hindostan se ham
rakkha hai be-niyaz usi be-niyaz ne
vabasta hi nahin hain kisi astan se ham
rakhta nahin hai koi shahadat ka hausla
us ke ḳhilaf laa.en gavahi kahan se ham
mahfil men us ne haath pakaḌ kar biTha liya
uThne lage the ek zara darmiyan se ham
had jis jagah ho ḳhatm harifan-e-‘ḳhair’ ki
vallah shuru hote hain aksar vahan se ham
Leave a Reply