Aurang Zeb
aa.ina hai ḳhayal ki hairat
us pe tere jamal ki hairat
koi chehra nahin tamanna ka
kuchh nahin ḳhadd-o-ḳhal ki hairat
kaun sa sharq kis tarah ka gharb
kya junub-o-shumal ki hairat
aisa karta huun bandh deta huun
zaḳhm par indimal ki hairat
dekhne vaala bhi pareshan hai
TuuTe shishe men baal ki hairat
dil pe chalta hai dard ka jaadu
aankh men hai malal ki hairat
de gaya hai javab aa kar vo
rah ga.i hai saval ki hairat
sab ko hairat men Daal deti hai
chaal par khaa.i chaal ki hairat
khinch leti hai ek din ḳhud hi
jal-pari ko bhi jaal ki hairat
tohfa milta hai jab janam-din pe
ḳhatm hoti hai saal ki hairat
tabsire the uruuj par mere
main ne dekhi zaval ki hairat
sab ayaan ho gaya zamane par
ḳhatm-shud mah-o-sal ki hairat
apna maazi bata raha hai ‘zeb’
lauT aa.egi haal ki hairat
Leave a Reply