Abu Mohammad Sahar
har khauf har khatar se guzarna bhi sikhiye
jiina hai gar aziiz to marna bhi sikhiye
ye kya ki duub kar hi mile sahil-e-najat
sailab-e-khun se paar utarna bhi sikhiye
aisa na ho ki khvab hi rah jaae zindagi
jo dil men thaniye use karna bhi sikhiye
bigde bahut kashakash-e-naz-o-niyaz men
ab us ki anjuman men sanvarna bhi sikhiye
hota hai pastiyon ke muqaddar men bhi uruuj
ik mauj-e-tah-nashin ka ubharna bhi sikhiye
auron ki sard-mehri ka shikva baja ‘sahar’
khud apne dil ko pyaar se bharna bhi sikhiye
Leave a Reply