ab kaun si mata-e-safar dil ke paas hai
ik raushani-e-sub.h thi vo bhi udaas hai
ik ek karke faash hue ja rahe hain raaz
shayad ye ka.enat qarin-e-qayas hai
samjha ga.i ye talḳhi-e-paiham firaq ki
ik muzhda-e-visal men kitni miThas hai
har chiiz aa rahi hai nazar apne ruup men
utra hua fareb-e-nazar ka libas hai
ik gardish-e-davam men roz azal se hai
vo chashm-e-ba-ḳhabar ki jo mardum-shanas hai
fitrat kahan thi apni ‘tamanna.i’ shabnami
lekin kisi ki sho.ala-nigahi ka paas hai
Leave a Reply