Zafar Iqbal
chalo itni to asani rahegi
milenge aur pareshani rahegi
isi se raunaq-e-dariya-e-dil hai
yahi ik lahar tufani rahegi
kabhi ye shauq na-manus hoga
kabhi vo shakl anjani rahegi
nikal jaegi surat aaine se
hamare ghar men hairani rahegi
subuk-sar ho ke jiina hai koi din
abhi kuchh din giran-jani rahegi
sunoge lafz men bhi phadphadahat
lahu men bhi par-afshani rahegi
hamari garm-guftari ke ba-vasf
hava itni hi barfani rahegi
abhi dil ki siyahi zor par hai
abhi chehre pe tabani rahegi
‘zafar’ main shahr men aa to gaya huun
miri khaslat bayabani rahegi
Leave a Reply