Lijiye Humse Ba-Kamal Log Bhi Aam Ho Gae

Aleena Itrat

lijiye ham se ba-kamal log bhi aam ho ga.e

jin se gurez tha hamen ham se vo kaam ho ga.e

aap kei baddua-e-dil aḳhir asar dikha ga.i

ham ko bhi ishq ho gaya ham bhi ghulam ho ga.e

chadar-e-ehtiyat aaj sar se hava jo le uḌi

zulf ke saare pech-o-ḳham manzar-e-am ho ga.e

bagh-e-badan men har taraf kaliyan chaTak chaTak ga.iin

bad-e-saba chali to ham ḳhushbu ḳhiram ho ga.e

aap se aap chhaT ga.e abr-e-ghaner hijr ke

ham bhi shab-e-siyah se mah-e-tamam ho ga.e

mo.ajiza ye nahin to kya nazren milin na baat kei

phir bhi salam ho ga.e phir bhi payam ho ga.e

ye kar-e-ishq ka safar aise ‘alina’ tai hua

dil un ka ham ne rakh liya ḳhud un ke naam ho ga.e