unhen mujh se go kuchh shikayat nahin hai
ghazab hai ki phir bhi inayat nahin hai
pila de mujhe apne hathon se saaqi
saḳhavat men koi nadamat nahin hai
sitam jan-nisaron pe din raat karna
mohabbat nahin hai muravvat nahin hai
uf itna takabbur ḳhuda.i ka da.ava
buto tum ko ḳhauf-e-qayamat nahin hai
karen ah-o-fariyad kya ham qafas men
ki ah-o-fughan ki ijazat nahin hai
azal se buton ki parastish hai hoti
naya ye tariq-e-ibadat nahin hai
‘naresh’ un ke zulmon ka shikva na hoga
ki fariyad ki mujh ko aadat nahin hai
Leave a Reply