Nahin kaTta Hai Ye Maidan-E-Bala

Poet

nahin kaTta hai ye maidan-e-bala

vadi-e-ḳhizr bayaban-e-bala

musta.id zulf miri ranj pe hai

hai muhayya sar-o-saman-e-bala

mar gaya gesu-e-pur-pech men dil

chhuT gaya qaidi-e-zindan-e-bala

haar phulon ki hain choTi men ayaan

kya hi phula hai gulistan-e-bala

bole bikhra ke vo zulfen apni

ham hue silsila-jumban-e-bala

unchi choTi hai ghazab ai yam-e-husn

kya hi uTTha hai ye tufan-e-bala

kaan ki lau tiri zulfon men nahin

hai charagh-e-tah-e-daman-e-bala

garmi-e-ruḳh se araq-rez hai zulf

hai guhar-bar ye naisan-e-bala

dil mire siine men hai mahv-e-mizha

hai yahi sher-e-niyastan-e-bala