hai mashaqqat miri in.aam kisi aur ka hai
kaam mera hai magar naam kisi aur ka hai
dhuup thi saath jo din bhar vo kisi aur ki thi
kya dhundlaka bhi sar-e-sham kisi aur ka hai
sar pe rahta hai hamesha hi kisi ka saaya
meri divar pe ye baam kisi aur ka hai
main to ḳhud apne hi nashshe men huun sarshar bahut
haath men hai jo mire jaam kisi aur ka hai
jaane ye kaun dhaḌakta hai mire siine men
mere honTon pe ravan naam kisi aur ka hai
haif apne liye kuchh kar na saka mar kar bhi
laash meri hai to kohram kisi aur ka hai
mera har saans bhi ḳhud mera nahin hai ‘hamdam’
ye badan aur ye ehram kisi aur ka hai
Leave a Reply