tumhare diid ki hasrat bahut mushkil se niklegi
dua ban kar shab-e-gham vo hamare dil se niklegi
ḳhabar kya thi ki teri kaj-ada.i se but-e-ra.ana
bisan-e-sham.a ro kar aarzu mahfil se niklegi
tamanna rafta rafta rang kuchh dikhla.egi apna
banegi nur-e-jan aur dida-e-kamil se niklegi
bisan-e-nik.hat-e-gul chhup nahin sakti chhupane se
ye bu-e-ḳhun-e-ashiq daman-e-qatil se niklegi
nihan kya ḳhaak hogi hasrat-e-didar ashiq ki
vo ik din yaas ban kar dida-e-bismil se niklegi
dikha.egi mohabbat ek din un ko asar apna
sama.i dil men jo un ke vo mere dil se niklegi
tasavvur janib-e-dil chahiye majnun tujhe karna
tu jis laila ka ashiq hai vo is mahmil se niklegi
Thahar ja naqa-e-dilbar ki main chumun qadam tere
sada ye musht-e-ḳhak-e-ashiq-e-be-dil se niklegi
zaban se nala-o-fariyad karna hai abas tera
‘jamila’ vo dua kaam aa.egi jo dil se niklegi
Leave a Reply